Acto: Presentación "Conciencia política e
literatura galega en Madrid (1950-2000)”
Día: 3 de outubro
Día: 3 de outubro
Hora: 20horas
Lugar: Museo Manuel Torres
Lugar: Museo Manuel Torres
Organiza: Asociación Queremos Galego Marín
A Asociación Queremos Galego Marín organiza o
próximo venres 3 de outubro, ás 20h no Museo Manuel Torres, a presentación do
libro “Conciencia política e literatura galega en Madrid (1950-2000)”, escrito
pola nosa veciña, e recentemente galardoada co
Premio Língua de Ouro da nosa asociación, Ana Acuña Trabazo.
Nesta presentación Ana Acuña estará acompañada de Manuel Bragado, director xeral de Edicións Xerais, e as madrigalegas María Xesús Nogueira, doutora en filoloxía da USC, e Olivia Rodríguez, profesora de teoría da literatura e literatura comparada da UDC.
Ana Acuña é doutora en Filoloxía Galega e
profesora na universidade de Vigo.. A maioría das súas investigacións
(centradas no exilio e na emigración, nas relacións entre a fraseoloxía e a
literatura popular, na literatura popular de transmisión oral, na oratura, no
feito literario alofónico e nos escritores pontevedreses ou vinculados á cidade
de Pontevedra) encóntranse en publicacións periódicas e en volumes colectivos,
aínda que tamén publicou obras da súa única autoría, entre as que destaca o seu
último libro, Conciencia política e literatura galega en Madrid (1950-2000).
Participa en numerosos colectivos en defensa do galego e ten unha grande labor
científica e divulgativa do noso idioma.
Esta obra analiza
a «historia vivida» da literatura galega en Madrid, ao tempo que reconstrúe os
quereres e mais os faceres dos grupos de madrigalegos que foron quen de
conformar, nunhas circunstancias de opresión política e cultural, unha
conciencia político-lingüística e un discurso literario galegos en Madrid nos
últimos cincuenta anos do século XX.
Con este marco de referencia, Ana Acuña
establece cinco etapas, cinco tramos cronolóxicos a través dos cales se moven
os principais grupos xunto con outros menos cohesionados e menos disidentes:
1952-1954 (Mocedade Universitaria Castelao), 1958-1961 (Brais Pinto), 1965-1969
(Seminario de Cultura Galega do Club de Amigos da Unesco de Madrid), 1974-1986
(Lóstrego, Irmandade Galega, Irmandade Galega-Lóstrego) e 1996-2000 (Grupo
Bilbao).
Na obra, onde aparecen as voces de 54
protagonistas destes grupos, recollidas con exquisita metodoloxía e presentadas
con rigor e fluidez pola autora, amósase de que xeito os madrigalegos crearon
unha serie de rexistros necesarios para a reconstrución do sistema literario
galego e para o devir histórico de Galiza.
No hay comentarios:
Publicar un comentario