10 oct. 2018

Inauguración da exposición “Mar de Marín”


Inauguración da exposición “Mar de Marín”
Día: 16 de outubro
Hora: 19h
Lugar: Museo Manuel Torres
Organiza: Club de Opinión Portocelo
O Club de Opinión Portocelo inaugura este martes 16 de outubro no Museo Manuel Torres de Marín ás 19h a exposición “Mar de Marín”.
Esta exposición que ten como protagonista principal o mar pretende reivindicar o achegamento de Marín ao mar e viceversa. É unha chamada de atención ao goberno municipal para que lle reclame á Autoridade Portuaria máis espazos abertos que permitan a vista, desde a contorna urbana, á ría.
A exposición conta cun grande número de fotografías dixitais baixadas das redes sociais, coa autorización das súas autoras e autores, do mar en Marín desde diversas localizacións.
A exposición poderá visitarse desde o día da inauguración, o día 16 de outubro, ata o 26 deste mes nos horarios habituais de apertura do Museo Manuel Torres.


8 oct. 2018

Presentación “O colapso territorial en Galiza”


Presentación “O colapso territorial en Galiza”
Día: 11 de outubro
Hora: 20:30h
Lugar: Museo Manuel Torres
Organiza: Asociación Queremos Galego Marín
A Asociación Queremos Galego Marín abre o curso 2018/2019 coa presentación do ensaio “O colapso territorial en Galiza” do xeógrafo Xosé Constenla o xoves 11 de outubro a partir das 20:30h no Museo Manuel Torres.
O “Colapso territorial en Galiza”, o ensaio co que Xosé Constenla gañou o XVII edición do Premio Ramón Piñeiro de Ensaio no ano 2017, non é unha recompilación esmerada de vales, cantís ou cumios. Tampouco é unha colección cartográfica ou un listado de nomes de lugares. Neste ensaio a xeografía emerxe como unha ciencia social – necesaria e útil- portadora dunha ferramenta de extraordinario poder analítico: o espazo.
O obxectivo do autor é poñer o espazo en primeiro lugar na lóxica interpretativa da sociedade, ampliar esa ollada tan estendida que entende o territorio como simple escenario para analizar tres aspectos fundamentais: as agresións ao medio natural e patrimonial, a cuestión demográfica a carón do desequilibrio da distribución da poboación e, ao cabo, a cidade xunto cos procesos de urbanización.
Xosé Constenla Vega é Doutor en Xeografía pola Universidade de Compostela, é técnico especialista en Sistemas de Información Xeográfica. Foi profesor de xeografía na Universidade da Coruña, na Universidade Carlos III de Madrid e investigador no Instituto Universitario de Estudos e Desenvolmento de Galiza (IDEGA). Traballou durante 8 anos como xeógrafo na Área de Urbanismo e Ordenación do Territorio de IDOM. Na actualidade é profesor da Universidade de Vigo na área de Didáctica das Ciencias Sociais e tamén na Universidade de León na área de Xeografía Humana.
Ademais de xeógrafo, Xosé Constenla tamén é un coñecido cantautor que xa ten actuado varias veces en Marín en actos organizados pola Asociación Queremos Galego Marín.

27 sept. 2018

Homenaxe no Pozo da Revolta


Homenaxe no Pozo da Revolta
Día: 30 de setembro
Hora: 13h
Lugar: Pozo da Revolta
Organiza: Asociación Pola Recuperación da Memoria Histórica de Marín
Como cada mes de setembro, a Asociación pola Recuperación da Memoria Histórica de Marín organiza no Pozo da Revolta, no lugar de Bagüín (Mogor), o acto de “ lembraza das persoas que defenderon a liberdade” .
Nesta ocasión, a homenaxe centrarase nos mariñeiros marinenses que tomaron parte na defensa da República en Euskadi, en 1936. A homenaxe será o domingo 30 de setembro, ás 13:00 h. No acto intervirá Carlos Villegas, integrante da asociación, e familiares daqueles nosos veciños.
Ademais do acto anterior, a ARMH organiza tamén o venres 28 de setembro a conferencia de Celso X. Milleiro Sánchez, precisamente baixo o titulo “Mariñeiros de Marín na defensa de Euskadi, 1936”,  na Casa de Cultura de Seixo a partir das 20:30h.

Conferencia “As Confrarías Gremiais das Danzas de Marín”


Conferencia “As Confrarías Gremiais das Danzas de Marín”
Día: 28 de setembro
Hora: 20h
Lugar: Museo Manuel Torres
Organiza: Padroado de San Miguel e Ateneo Santa Cecilia
Co gallo do día de San Miguel, este venres 28 de setembro o Padroado de San Miguel e o Ateneo Santa Cecilia organizan unha conferencia ás 20h no Museo Manuel Torres sobre as danzas de San Miguel.
Nesta conferencia titulada “As Confrarías Gremiais das Danzas de Marín”, participará o mestre José Antonio Pazos Pazos, un curioso pescudador da nosa historia. Estará ademáis acompañada de Queta Molas, presidenta da ARPMHM, e polo gaiteiro do grupo Picuíña José Gil Dopazo, que interpretará algunhas pezas musicais coa gaita recuperada dos “Marañóns”.

5 sept. 2018

Presentación “Onde estarán as fermosas roseiras?”


Presentación “Onde estarán as fermosas roseiras?”
Día: 14 de setembro
Hora: 20h
Lugar: Biblioteca de Marín
Organiza: Club de Opinión Portocelo
O Club de Opinión Portocelo retoma a súa actividade cunha homenaxe dentro das súas Xornadas-Reencontro coa Historia de Marín, ao poeta e compositor Manuel Cambeiro Suárez.
Na homenaxe ,que terá lugar na Biblioteca de Marín o día 14 de setembro ás 20h, será presentado o libro 'Onde estarán as fermosas roseiras?' legado do poeta, escritor e compositor Manuel Cambeiro Suárez (1920-199). A presentación estará a cargo do fillo do autor Carlos Cambeiro Alís. 
Durante o acto haberá un recital poético no que intervirán: Enriqueta Otero Molas, presidenta da APRDMH; Tesi L. Carragal, presidenta de Mulleres O Abeiro e a poetisa Manola Vázquez.
Ademais do recital, o acto tamén contará cun concerto da Coral Polifónica de A Guarda, dirixida por Rosa González Fernández que interpretará a canción “Miña Galicia” do autor do poemario.

Mercado Solidario Marín 3R


Mercado Solidario Marín 3R
Día: 9 de setembro
Hora: 10h
Lugar: Alameda Rosalía de Castro
Organiza: O Abeiro
O próximo domingo día 9 de setembro, coincidindo coas festas da Virxe do Porto, terá lugar o mercado solidario Marín 3R na Alameda Rosalía de Castro de 10h a 22h. Como sempre este mercado solidario está organizado pola Asociación de Mulleres O Abeiro. Nesta ocasión haberá uns 30 postos nos que se poderá mercar desde bisutería, roupa, calzado, xoguetes ata mobles recuperados e antigüidades.
O Abeiro obsequiaralle ás persoas que máis colaboren solidariamente en beneficio das 3R cunhas bolsas de tea recicladas, patrocinadas polo Concello de Marín.
As ‘abeiranas’ con este agasallo procuran conseguir que a xente se conciencie no uso das bolsas reutilizables e non usen as de plástico polas que os supermercados veñen cobrando.

14 ago. 2018

Homenaxe a Carmen Pesqueira Domínguez, A Capirota


Homenaxe a Carmen Pesqueira Domínguez, A Capirota
Día: 18 de agosto
Hora: 11:30h
Lugar: Rúa da Roda
Organiza: Asociación pola Recuperación da Memoria Histórica de Marín
A Asociación para a Recuperación da Memoria Histórica de Marín organiza un acto de lembranza e homenaxe a Carmen Pesqueira Domínguez, “A Capirota”, veciña de Marín asasinada no macabro verán de 1936 no Pozo da Revolta, no lugar de Bagüín. Muller valente e loitadora polos dereitos das traballadoras e traballadores, a barbarie fascista acalou a súa voz reivindicativa de xeito vil e covarde; mais non a borraron da memoria de Marín, nin puideron evitar que chegara o exemplo e a semente da súa vida inmolada por berrar as inxustizas.
Durante o acto, que será o vindeiro sábado 18 de agosto e comezará ás 11:30 h., atendendo ao acordo unánime do Pleno do Concello de Marín celebrado o pasado 9 de maio, terá lugar o descubrimento dunha placa conmemorativa na nova Praza e Xardín que levará o nome da nosa veciña na Rúa da Roda, coa presenza e participación de familiares da homenaxeada.
Tras a presentación e benvida a cargo da presidenta da asociación, Enriqueta Otero, haberá unha intervención de Xina Vega, profesora da Universidade de Vigo e investigadora, e unha actuación de Xistra, dúo de música clásica e contemporánea, e de Picuíña, cuarteto tradicional de gaita.

2 jul. 2018

Acto de entrega dos Premios Lingua 2018


Acto de entrega dos Premios Lingua 2018
Día: 6 de xullo
Hora: 21h
Lugar: Bar Lorenzo (Taberna da Potona)
Organiza: Asociación Queremos Galego Marín
A Asociación Queremos Galego Marín entregará os Premios Lingua deste ano nun acto o venres, 6 de xullo, a partir das 21h no bar Lorenzo (Taberna da Potona) localizado na rúa Sagrada Familia nº5 de Cantodarea.
Con eles, a asociación quere recoñecer publicamente o labor daquelas persoas e colectivos que contribúen á normalización, dignificación e valorización da nosa lingua, cultura e medio. Por outra banda, pretende concienciar os premiados co Premio Lingua de Trapo dos dereitos lingüísticos das persoas galegofalantes, da importancia da nosa lingua e da seriedade do seu estado de saúde.
Como en anos anteriores foron varios os nomes de persoas e colectivos que saíron á palestra para recibir o premio, mais finalmente os membros da asociación decidiron concederlle este 2018 os seus premios a:
·         Premio Lingua de Ouro na categoría individual para Raúl Pesqueira Fariña, artesán de xoiaría marinense que, continuando unha longa tradición familiar, rexenta o seu propio taller de xoiaría en Marín. Raul Pesqueira inspírase nos motivos patrimoniais de Marín para crear diferentes tipos de alfaias cos que promocionar e descubrirlle á xente o noso patrimonio. Alén disto, este xoieiro atende, realiza toda a comunicación, difusión, promoción e documentación do seu taller en lingua galega.
·         Premio Lingua de Ouro na categoría de colectivos para Os Saljariteiros de Marín. Concedémoslles este premio por faceren da música tradicional a súa razón de ser, contribuíndo de xeito importante á normalización da nosa lingua e á preservación e recuperación de tradicións musicais como os cantos de taberna, seráns, cantos de reis e outras manifestacións culturais que cómpre preservar para o futuro.
·         Premio Lingua de Trapo para o concelleiro de rural Pablo Novas Caballero por mal entender como parte das súas funcións públicas de representación institucional e tarefas políticas, a recollida “a eito” da toponimia e microtoponomia, de xeito totalmente acientífico, sen contrastar e sen asesoramento técnico lingüístico.
A Asociación Queremos Galego Marín reclama neste senso, como xa o fixo noutras ocasións, a contratación dun servizo de normalización lingüística que poña os piares para mellorar a situación e uso do galego en Marín, e que se ocupe, coordine e dirixa tarefas como a da recollida da toponimia e a microtoponimia con criterios lingüísticos contrastábeis.
Durante o acto de entrega dos premios, a Asociación Queremos Galego Marín tamén realizará unha pequena homenaxe póstuma á marinense Concepción Sanjorge Couso,  Concha “Cara Lavada”, falecida en abril deste ano.
Neste acto, no que colabora o Concello de Marín, as persoas e colectivos premiados recollerán unha figura realizada polo taller de cerámica marinense Alén das Olas.


Presentación “Ons no meu corazón”


Presentación “Ons no meu corazón”
Día: 4 de xullo
Hora: 20:30h
Lugar: Museo Manuel Torres
Organiza: Club de Opinión Portocelo
O Club de Opinión Portocelo organiza a presentación do novo libro do xornalista local Julio Santos Pena, “Ons no meu corazón”, nun acto que terá lugar o vindeiro mércores, 4 de xullo, ás 20:30h no Museo Manuel Torres de Marín.
O libro recolle unha serie de vicisitudes, anécdotas e relatos vividos polo autor na principal illa do arquipélago das Ons durante os anos que exerceu alí como mestre de escola.
No acto, que será presentado por Ángel García Carragal, intervirán ademais do autor do libro, Artur Sánchez Cidrás, mestre xubilado, e Lupe García Prieto, licenciada en filoloxía galega.

28 jun. 2018

Proxección do documental “A ameaza do cobre”


Proxección do documental “A ameaza do cobre”
Día: 29 de xuño
Hora: 20:30h
Lugar: Ateneo Santa Cecilia
Organiza: Ateneo Santa Cecilia
Este venres, 29 de xuño, o Ateneo Santa Cecilia proxectará ás 20:30h no seu local, situado na rúa do Forno nº42, o documental “A ameaza do cobre” de Xosé Bocixa.
No documental, de case una hora de duración, trátase o conflito xurdido nos concellos de Touro e O Pino e a súas contornas, ante o megaproxecto de Cobre San Rafael, da man da multinacional Atalaya Mining, pretende reabrir as vellas minas de cobre que terán un forte impacto medioambiental, económico e social na zona.
O filme, elaborado por Tingalaranga Audiovisual en colaboración con Nós TV, recolle testemuños de científicos, alcaldes, empresarios e habitantes dos municipios afectados.
Ao rematar a proxección do documental haberá un debate no que participarán os autores do documental.