8 feb. 2018

Conferencia: “O entroido en Marín e no Morrazo”


Conferencia: “O entroido en Marín e no Morrazo”
Día: 9 de febreiro
Hora: 20h
Lugar: Museo Manuel Torres
Organiza: Ateneo Santa Cecilia
O Ateneo Santa Cecilia, en colaboración co Concello de Marin, dá o pistoletazo de saída do Carnaval marinense deste ano cunha Conferencia no Museo Manuel Torres ás 20 h do venres dia 9 de febreiro.
A conferencia será impartida por Xosé Anxo Rosales, membro da Sociedade Antropolóxica galega, gran coñecedor do Entroido no Morrazo, do de Cobres e no Concello de Marín, dos que ten publicado un libro e diversos artigos en revistas científicas.
Na conferencia falará dos torreiros que houbo no igrexario de  San Xulián, na Pardavila, Cadrelo, igrexario de Santo Tomé e na Teoira, das máscaras, dos farrapalleiros, vascalleiros e os de bonito, ademais dos zoomorfos, todos eles diversas maneiras de celebrar o Entroido no noso Concello, nalgúns casos até mediados do século XX.
Falará dos diversos rituais, destacando a corrida do galo de Cadrelo que ían acompañadas de carreiras da cabalo (das que quedan moi poucas testemuñas gráficas.
Todo isto acompañado de proxección de imaxes rescatadas por algúns veciños, asi como testemuñas reais.

4 feb. 2018

Presentación de “Elefantes de papel”

Presentación de “Elefantes de papel”
Día: 9 de febreiro
Hora: 20h
Lugar: Adega da Capeleira
Organiza: Asociación Queremos Galego Marín
A Asociación Queremos Galego Marín presentará o vindeiro 9 de febreiro o libro solidario “Elefantes de papel” ás 20h na Adega da Capeleira de Marín.
“Elefantes de papel” é un libro composto por 52 relatos curtos escritos por María Salinas e Berto Pirata e as ilustracións de Humberto Ademar Farías Iglesias. Estes textos tratan distintas temáticas sociais como a pobreza, o papel dos avós na sociedade, o coidado da terra, os refuxiados xunto con outros temas como o amor, o humor, etc.
Con este libro os autores pretenden crear unha vaga de solidariedade cuxo primeiro paso é doar un euro por cada libro vendido á ong Conrazones. A maiores en cada presentación os autores tamén doarán outro euro por libro vendido á asociación que organice o acto ou a aquela ong que que esta decida. No caso da presentación en Marín, a Asociación Queremos Galego Marín destinará tamén a cantidade que lle pudese corresponder á ong Conrazones.
Este libro que tamén se publicará en breve en braille a través da ONCE presentarase en 52 actos, tantos como relatos, ao longo e ancho de todo o país.
Na presentación intervirán os seus autores María Salinas e Berto Pirata para nos explicar de onde xurdiu esta idea, falarannos dos seus textos e da acollida que está a ter o libro nas vilas onde xa se presentou.

1 feb. 2018

Presentación de "Herdeiras”

Presentación de "Herdeiras”
Día: 2 de febreiro
Hora: 20h
Lugar: Local do Ateneo Santa Cecilia
Organiza: Ateneo Santa Cecilia APRMHM
Este Venres día 2 de febreiro o Ateneo Santa Cecilia e a Asociación pola recuperación da Memoria histórica de Marín presentan o libro-CD “Herdeiras” de Carmen Penim.
O acto terá lugar ás 20 horas no local do Ateneo, na Rúa do Forno nº42 baixo.
Trátase dun evento gratuíto que servirá para recordar o sufrimento das mulleres repesaliadas polo franquismo, mulleres valentes que sufriron dobre represión, a do réxime, ademais de ser torturadas, encarceradas, humilladas, paseadas e obrigadas a aceptar a perda dos seus dereitos.
Presentarase o libro-CD “Herdeiras” no que colaboraron herdeiros e herdeiras desas mulleres, fillas, netos e netas de represaliados na guerra e na posguerra.
En “Herdeiras” colaboraron diversas personalidades, escritores, políticos, músicos e feministas, algúns deles estarán presentes no acto que se celebrará este venres no Ateneo como por exemplo Carmen Gallego, e Maurizio Polsinelli que acompañarán a autora co violín, a nickelharpa e o piano.
Ao finalizar a actuación musical na que a autora nos ofrecerá un amplo repertorio de cancións asinaralle os libros a todos os que o desexen.

12 ene. 2018

Debate "O Marín que queremos"

Debate "O Marín que queremos"
Día: 19 de xaneiro
Hora: 20h
Lugar: Museo Manuel Torres
Organiza: Club de Opinión Portocelo
O Club de Opinión 'Portocelo' abre as súas actividades para este exercicio o próximo venres día 19, ás 20.00h no Museo M. Torres, cunha charla-coloquio aberta á cidadanía sobre a política municipal, na que baixo o lema 'O Marín que queremos', intervirán Xosé Emilio Dopazo Recamán (Ldo. en Económicas. Economía Pública) que presentará a súa poñencia 'Ensanche Marín 2020. Abrir Marín ó mar' e Antón Pousada (presidente do colectivo cultural 'Ronsel'; ex Profesor de Tecnoloxía e ex concelleiro) que falará sobre 'Seixo, outra realidade'. En ambas poñencias faise referencia ás demandas sobre as que veñen insistindo os marinenses nos últimos meses como o Auditorio, o destino da Casa do Mar, o Pavillón de Deportes de Seixo, infraestruturas para os deportes náuticos,  un plan director para a Lagoa de Castiñeiras, etc. 
O coloquio será dirixido polo presidente do foro de opinión Angel G. Carragal e  desenvolverase a modo de coloquio aberto no que poderán participar todas as persoas que asistan se o desexaren. Neste sentido a organización fai un especial chamamento a  representantes do asociacionismo marinense de representantes políticos para que participen no coloquio, acheguen e intercambien as súas opinións e experiencias ao debate. 

Presentación de GZmúsica e Ouve!

Presentación de GZmúsica e Ouve!
Día: 12 de xaneiro
Hora: 20h
Lugar: Museo Manuel Torres
Organiza: Asociación Queremos Galego Marín
A Asociación Queremos Galego Marín presentará o venres 12 de xaneiro ás 20h no Museo Manuel Torres a web GZMúsica e o fanzine sobre a música galega Ouve!
A Asociación Queremos Galego Marín comeza o ano 2018 cunha actividade relacionada coa música galega no marco dunhas xornadas que se levarán a cabo durante todo este ano tituladas “o galego máis alá da literatura”.
Nun acto que se celebrará ás 20h no Museo Manuel Torres de Marín a asociación presentará dúas iniciativas de comunicación ao redor da escena musical galega como son a web GZMúsica e o fanzine Ouve!
GZMúsica é unha web nada no 2012 que se adica á música galega e pretende achegar información sobre todo o que acontece arredor das músicas do pais. Unha web onde se poden atopar desde calendarios de concertos, entrevistas, videoclips ata resumos de distintos festivais musicais que se celebran ao longo e ancho do país.
Ouve! é un fanzine en papel que se distribue desde hai case un ano de xeito gratuíto polos locais do país para falar da música galega con crónicas de concertos, críticas aos novos discos dos distintos grupos galegos.
Hai xa ben tempo que a música galega é algo máis que a música folk e as gaitas dos grupos tradicionais. Na actualidade a escena musical galega malia as súas limitacións ferve en festivais, en grupos de música que van desde o pop, o hip hop, garaxe, ata o punk, rapcore ou metal. Se non hai tantos anos eran os Diplomáticos de Monte Alto, Lamatumba, Dios Ke te Crew ou os Heredeiros da Crus eran os grupos de moda, agora cantantes coma Ses, grupos como Nao, Ezetaerre, Familia Caamagno ou Terbutalina enchen as salas de música e os festivais de seareiros que demostran o potente que é a nosa escena.
Para nos falar destes dous proxectos e do panorama musical galego a Asociación Queremos Galego Marín contará coa presenza de Dani Lavesedo fundador tanto de GZMúsica como de Ouve! e gran coñecedor do panorama musical galego.

28 dic. 2017

Homenaxe ás persoas asesinadas o 31 de decembro de 1936

Homenaxe ás persoas asesinadas o 31 de decembro de 1936
Día: 31 de decembro
Hora: 13h
Lugar: Paseo Antonio Blanco
Organiza: Asociación pola Recuperación da Memoria Histórica de Marín
O domingo 31, a partir das 13 h., terá lugar no Paseo Marítimo “Antonio Blanco” o tradicional acto de homenaxe e lembranza das persoas asasinadas por defender a liberdade, no 31 de decembro do ano 36. Intervirá o historiador e catedrático de xeografía e historia Francisco Calo Lourido (investigador no campo da antropoloxía e da arqueoloxía), e realizarase a anual ofrenda floral. Contaremos coa ambientación musical a cargo da agrupación Os Amigos Gaiteiros.

Conferencia “A represión franquista en Galicia. Algunhas claves interpretativas”

Conferencia “A represión franquista en Galicia. Algunhas claves interpretativas”
Día: 29 de decembro
Hora: 20h
Lugar: Museo Manuel Torres
Organiza: Asociación pola Recuperación da Memoria Histórica de Marín
O venres, día 29, o profesor Julio Prada Rodríguez ofrecerá a conferencia “A represión franquista en Galicia. Algunhas claves interpretativas”. Comezará ás 20 h. no Museo Manuel Torres.
Julio Prada Rodríguez é profesor titular de Historia Contemporánea na Universidade de Vigo, secretario do Centro Asociado da UNED de Ourense e licenciado en Dereito. Está especializado no estudo da violencia política, o primeiro franquismo (a II República, a guerra civil e a represión) e a transición á democracia; conta cunha ampla e intensa traxectoria na investigación, tendo dirixido varios proxectos e publicados unha vintena de libros, ademais de numerosos artigos e participacións en congresos. Foi Premio de Investigación Histórica de Galicia “Antonio Fraguas” e é considerado como un dos máis recoñecidos investigadores en Galicia.

22 dic. 2017

Chegada do Apalpador a Marín

Chegada do Apalpador a Marín
Día: 31 de decembro
Hora: 17h
Lugar: rúas de Marín
Organiza: Almuinha, Gharaboto e Asociación Marinense de Artesáns
A asociación Almuinha conxuntamente coa asociación Gharaboto e a Asociación Marinense de Artesáns organiza a chegada do apalpador a Marín para o vindeiro domingo 31 de decembro.
Ese domingo, o apalpador percorrerá a partir das 17h as rúas da vila acompañado do seu grupo de músicos (Os de Marín) e achegarase a toda a rapazada para repartir doces. Ás 18h chegará á carpa da Feira de Artesanía na Alameda Rosalía de Castro onde entregará os premios do III concurso de debuxos “Debuxando o apalpador”.
Para que a espera sexa máis levadeira, na carpa da Feira de Artesanía estará instalado o posto do apalpador, onde se atopa unha imaxe xigante do carboeiro para que así quen o desexar, poda tirar unha foto facendo de apalpador.


21 dic. 2017

Homenaxe na Raña da APRMHM

Homenaxe na Raña da APRMHM
Día: 23 de decembro
Hora: 12h
Lugar: Museo Manuel Torres
Organiza: Asociación pola Recuperación da Memoria Histórica de Marín
Este sábado, día 23 de decembro, a Asociación pola Recuperación da Memoria Histórica de Marín organiza un acto ás 13 h que consistirá na colocación dunha placa no muro do cemiterio de A Raña, para sinalar este lugar da memoria.
Entre os diversos sucesos acaecidos na contorna, a APRMHM lembra un especialmente tráxico: o 7 de decembro de 1936 aparecen os corpos dos veciños da vila de Bueu Francisco Escáneo Franco​ e Francisco García Villanueva, concelleiros, e de Xacinto Lamosa Novas, Xosé Seixas Camiña e Xulio Castro Martínez, dirixentes obreiros; asasinados nas inmediacións do cemiterio municipal de Marín.
Antes do citado acto, ás 12 h. no Museo Manuel Torres, a Asociación Amigos de Johan Carballeira, de Bueu, presentará o traballo de investigación "Crónica da represión en Bueu no golpe militar do 36".

11 dic. 2017

Xornadas de memoria histórica

A Asociación pola Recuperación da Memoria Histórica de Marín presenta o programa de actividades e actos para este mes de decembro, no que se cumpren 10 anos da súa creación.
Comezará coas XORNADAS DE MEMORIA HISTÓRICA, organizadas xunto coa Fundación Alexandre Bóveda e coa especial colaboración do Instituto Galego de Historia (Igalhis), que terán lugar os días 14, 15 e 16 .

O xoves 14, ás 20 h. no salón de actos do IES Illa de Tambo, a compañía Avelaíña Teatro porá en escea a obra “A Lola”, que representa a todas as mulleres que sobreviviron aos seus maridos, arrebatados polo terror franquista.
O venres 15, ás 18:00 h. no Museo Municipal Manuel Torres, o profesor da Universidade da Coruña Carlos Velasco Souto, iniciará o ciclo de conferencias coa ponencia “1931-1936. República e tecido social e político”. Ás 18:30 h.  Xoán Carlos Garrido Couceiro, investigador e membro da Iniciativa Galega pola Memoria, falará sobre “1931. A proclamación da República Galega” e a catedrática da Universidade de Santiago de Compostela Aurora Marco pechará esta primera parte, ás 19:00 h., con “1931-1936. Mulleres na Galiza republicana”.
A partir das 20:00 h., terá lugar a presentación do traballo de investigación “Memorias de sal e terra. O ensino no concello de Marín (1867-1940)”, de Xosé Manuel Moreira Docampo e Celso Xavier Milleiro Sánchez, editado pola Deputación de Pontevedra. Ademais dos autores, intervirán Xosé Leal, deputado provincial de Cultura e Lingua, e Enriqueta Otero, presidenta da ARMH de Marín.
Na mañán do sábado 16,  a partir das 10:30 h.,reanudarase no Museo Municipal o ciclo de conferencias coa ofrecida polo catedrático de Historia do Ensino Medio Bernardo Máiz Vásquez, baixo o título “1936. Golpe militar e represión contra a República”. A continuación, o docente e investigador Xosé Álvarez falará do “Golpe militar e represión franquista e Pontevedra e a súa bisbarra”, para rematar coa ponencia de Uxío-Breogán Diéguez Cequiel, profesor da Universidade da Coruña, sobre “1936\39-1950. O exilio galego alén do mar na súa primeira etapa”.
O peche destas Xornadas de Memoria Histórica será a presentación, ás 13:00 h., do libro “ Meirás, un pazo, un caudillo, un espolio”, de Manuel Pérez e Carlos Babío e editado pola Fundación Galiza Sempre.

COLOCACIÓN DE PLACA CONMEMORATIVA
O sábado 23, ás 12:00h. no Museo Manuel Torres, Xosé Novas Piñeiro e Manuel Antón Mosteiro García, da Asociación Amigos de Johan Carballeira, presentarán o traballo de investigación “Crónicas da represión en Bueu no golpe militar do 36”.
Limiar da publicación:
Estas crónicas da represión en Bueu no golpe militar do 36, agrupan a revista editada no 2007 revisada, a revista editada no 2012, xunto con unha cronoloxía da represión en Bueu no primeiro ano despois do golpe e fotos de veciñas rapadas.
…..// Sirva como homenaxe aos que sufriron defendendo a democracia e as liberdades..

A continuación, ás 13:00h. no Cemiterio de A Raña, terá lugar o acto de inauguración da placa conmemorativa colocada como “lugar de memoria”, en lembranza das persoas que alí sufriron a represión franquista.
Entre os diversos sucesos acaecidos na contorna do cemiterio de A Raña, temos un especialmente tráxico e os seus tristes protagonistas eran veciños da vila irmán de Bueu.
O 6 de decembro de 1936 o concelleiro Francisco Escáneo Franco é encarcerado no calabozo de Bueu canda outros veciños. Conseguen fuxir pero volven a ser detidos esa mesa noite e asasinados nas inmediacións do cemiterio municipal de Marín. O 7 de decembro aparece o seu corpo cando o do concelleiro Francisco García Villanueva e dos dirixentes obreiros Xacinto Lamosa Novas, Xosé Seixas Camiña e Xulio Castro Martínez.

PECHE DOS ACTOS DE 2017
O profesor de historia contemporánea da Universidade de Vigo, Julio Prada Rodríguez, ofrecerá a conferencia “A represión franquista en Galiza. Algunhas claves interpretativas”, o venres 29 ás 20:00 h., tamén no museo municipal.
E cerrando os actos do 2017, a Asociación pola Recuperación da Memoria Histórica de Marín, como cada último día do ano, lembrará aos executados do 31 de decembro de 1936, no paseo Alcalde Antonio Blanco, a partir das 13:00 h. Contaremos, nesta ocasión coa intervención de Francisco Calo Lourido, catedrático de Xeografía e Historia e investigador.