Día: 13 de novembro
Hora: 20horas
Lugar: Biblioteca de Marín
Organiza: Asociación Queremos Galego Marín
A Asociación Queremos
Galego Marín pecha este vindeiro mércores 13 de novembro ás 20h na Biblioteca Municipal Vidal Pazos de Marín o ciclo de actos enmarcados nas “Xornadas Ser lingua non é fácil” cunha
conferencia sobre a situación da lingua galega na administración de xustiza.
Malia seren galegos/as
o 90% dos xuíces e das xuízas, a nosa lingua é escasamente utilizada nos
xulgados e tribunais galegos ata ficar practicamente na marxinalidade, o que se
reflicte en que apenas o 5% das resolucións xudiciais están redactadas neste
idioma.
Aínda que falen
habitualmente en galego, moitas das persoas usuarias da administración de
xustiza deixan a súa lingua fóra do xulgado cando cruzan as súas portas por
creren que na xustiza non se fala nin se pode falar galego. Son os mesmos
prexuízos que provocan o cambio ao castelán en ámbitos formais como a consulta
dun médico, unha oficina bancaria, a notaría, etc.
Alén das razóns de
cada xulgado e dos seus funcionarios e funcionarias para non usaren o galego
como lingua de traballo, hai que destacar tamén a falta de medios axeitados
para favorecer o seu uso e que a aplicación informática non teña os documentos
traducidos ao galego deixando á boa vontade e á destreza do funcionariado esta
tarefa.
O uso do galego na
administración da xustiza non goza, pois, dunha situación normalizada, e son
honrosas e contadas as excepcións de maxistrados como Luis Villares e Xosé Xoán
Barreiro, fiscais como Carlos Varela, e mais os avogados/as e funcionarios/as
da administración de xustiza que fan parte da Irmandade Xurídica Galega e que
promoven o emprego do idioma no ámbito da xustiza.
Para achegarnos a esta
situación, a Asociación Queremos Galego Marín contará coa presenza do
maxistrado da Sección Segunda da Audiencia Provincial de Pontevedra, Xosé Xoán
Barreiro Prado, considerado o maxistrado que máis resolucións ten ditado
en galego na historia da nosa lingua, e de Anxos Sobriño membro do equipo
lingüístico da Audiencia Provincial.
No hay comentarios:
Publicar un comentario