Organiza: Asociación Queremos Galego Marín
A Asociación Cultural Queremos Galego
Marin organiza o próximo xoves 26 de Marzo a presentación da obra de Ramón
Trigo “Leviatán”, na Biblioteca Municipal ás 20h.
Na recente edición dos Premios Ánxel
Casal, nun acto no cal a Asociación Galega de Editores reúne anualmente a
representantes do sector do libro de Galicia, a obra Leviatán de Ramón Trigo
-publicada no selo Faktoría K, de Kalandraka- foi galardoada co Premio Isaac
Díaz Pardo ao libro mellor ilustrado publicado en galego durante o ano 2014.
De formación autodidacta, iniciou a
súa traxectoria artística como ilustrador e debuxante de cómic en xornais e
revistas especializadas. As súas primeiras obras pictóricas datan da década de
1980; dende entón ilustra libros para varias editoriais e realiza exposicións,
ademais da súa faceta como escultor. A súa obra presentouse en Alemaña,
Bélxica, Lituania, Italia e Portugal. Foi incluído na selección The White
Ravens. Entre os galardóns recibidos figuran o Premio Arte Xoven Galego, os
premios de álbum ilustrado infantil Cidade de Alacante e Cabildo de Gran
Canaria, e o Premio Lazarillo.
“Leviatán” é unha proposta pictórica
do artista Ramón Trigo, de imaxes rotundas para unha historia novidosa e
enigmática na que abundan as referencias a outros textos, dende “Moby Dick” ao
“Libro dos Salmos”. No fondo, é un traballo cunha importante carga simbólica: a
complexa relación entre os seres humanos e a natureza, as agresións que sofre o
planeta que, malia todo, continúa o seu cíclico devir.
Dende o punto de vista artístico,
“Leviatán” destaca pola forza e pola expresividade das ilustracións,
representadas cunha paleta de cores básica e trazos esquemáticos. A
multiplicidade de planos e perspectivas suxire un plantexamento cinematográfico
na sucesión das imaxes, ao ritmo da lectura. Ramón Trigo non escatima en
metáforas visuais e sorprendentes xogos humorísticos nun único e desacougante
escenario: o océano.
A nivel literario, trátase dunha
historia con estrutura circular, a base de frases breves e descritivas. En
conxunto, un texto onde o misterio atrapa a atención dos lectores, que son
partícipes das peripecias da tripulación dun barco na súa ardua persecución
dunha enorme balea, como alegorías do mundo e dos seus insensibles habitantes.
No hay comentarios:
Publicar un comentario