Acto: Mesa redonda "Literatura de terror e de ciencia ficción"
Día: 19 de marzo
Hora: 19:30horasDía: 19 de marzo
Lugar: Biblioteca de Marín
Organiza: Asociación Queremos Galego Marín
A Asociación Queremos
Galego Marín organiza o próximo 19 de marzo unha mesa redonda sobre o mundo
literario da Ciencia Ficción e o Terror. Un “xénero” que conta con
propostas editoriais, escritores e escritoras propias no noso idioma e cun
importante número de traducións de clásicos e escritoras contemporáneas.
Temos que destacar
dous proxectos galegos, Contos Estraños e Urco Editora que, combinados ou por
separado, son as principais editoriais de fantasía, ciencia ficción e terror
nas súas diversas modalidades. Proxectos onde persoas editoras e escritoras se
confunden
O acto terá lugar na biblioteca de Marín a partir das 19:30h
e para nos falar deste tipo de literatura, da complexidade de editar e escribir
libros na nosa lingua, da acollida que ten este xénero entre o público galego,
contaremos coa presenza de:
Fernando M. Cimadevila é escritor,
editor e músico. En novembro de 2011 uniuse a Tomás González Ahola, editor de Urco editora, para
crear Contos
Estraños, a primeira editora galega especializada en Fantasía,
Terror e Ciencia-Ficción de autores e autoras galegas.
Tomás González Ahola estudou filoloxía clásica na USC. É
tradutor de linguas inglesa e finesa á galega. Traduciu títulos
para Rinoceronte
editora e sobre todo para Urco, editorial da que
foi cofundador en 2007. No ano
2011 foi tamén un dos fundadores da editora Contos Estraños.
David Cortizo. Editor de Urco, é
actualmente o encargado de todas as publicacións que realiza Urco. Realiza
labores de selección, tradución e corrección de textos, tanto para Urco como
para Contos Estraños.
Susana Ons. Ademais de
escritora de relatos de fantasía é actriz e directora de escena en teatro.
David Botana. É un escritor de
relatos de terror asiduo ás antoloxías periódicas de Contos Estraños. É un dos
maiores expoñentes dunha nova corrente denominada Agroterror, que inclúe
elementos de terror gore e psicolóxico nun ambiente rural.
Contos Estraños é
unha editorial galega con sede en Compostela. Creada
no ano 2011 coa intención de
promover a literatura de fantasía, terror e ciencia ficción en
galego. Os seus fundadores foron Fernando M. Cimadevila e Tomás
González Ahola e o proxecto púxose en marcha cunha chamada en Internet á que acudiron diversos autores.
O proxecto editorial foi
enfocado en tres liñas diferenciadas. Unha revista periódica onde se reunirían
en volumes colectivos as creacións dos numerosos escritores e ilustradores, a
publicación de novelas individuais e unha liña infantil que, segundo as
palabras dos seus propios creadores, "servise para ir frikizando as
xeracións máis novas".
Urco editora é
unha editorial nada en 2007 que veu encher un oco histórico no sistema
literario galego: a publicación sistemática e especializada de literatura de
fantasía, ciencia ficción e terror. Até agora a escasa presenza destes xéneros
na literatura traducida estaba fragmentada en distintas editoriais e
coleccións, catalogada especialmente baixo os criterios de «clásicos» ou de
«literatura xuvenil». Por isto URCO foi pioneira na achega sistemática destes
tres xéneros ao público galego.
No hay comentarios:
Publicar un comentario