Acto: Charla “1916-2016 Cen anos das Irmandades da
Fala”
Día: 6 de maio
Hora: 20h
Lugar: Biblioteca de Marín
Organiza: Asociación Queremos Galego Marín
Neste
2016 cúmprense os cen anos do nacemento das Irmandades da Fala, unha
organización que podemos considerar un dos fitos fundamentais da historia
contemporánea do país, e desde a Asociación Queremos Galego Marín sumámonos a
esta celebración organizando unha charla coloquio o vindeiro venres 6 de maio.
Para este acto, que comezará ás 20h na biblioteca municipal de Marín,
contaremos coa intervención do historiador e profesor da Universidade da
Coruña, Uxío-Breogán Diéguez Cequiel.
En
1916 constituíuse na cidade da Coruña a Irmandade de Amigos da Fala, un
movemento de reivindicación da lingua, que por primeira vez, reclama o seu uso
pleno en todos os ámbitos da sociedade. A partir desta primeira xuntanza na que
Antón Vilar Ponte é escollido Primeiro Conselleiro, comezan a constituírse
Irmandades noutras localidades galegas, sumándose intelectuais e
escritores como Ramón Cabanillas, Otero Pedrayo, Castelao, Risco, Losada
Diéguez ou Ánxel Casal.
Ás
Irmandades debémoslle a creación do histórico xornal “A Nosa Terra”, que desde
o primeiro momento foi ou seu voceiro, editándose sen interrupcións até o ano
1936.
Desenvolverán
un intenso labor identitario, de creación de símbolos nacionais e de promoción
da lingua. O firme compromiso e propósito das Irmandades da Fala de traballar
por unha Galiza máis culta, libre, xusta e comprometida consigo mesma, supuxo
unha nova forma de concibir o país, xa que, por primeira vez na historia, unha
organización nada na Galiza decidía adoptar como eixo da súa definición a idea
nacionalista, situando a nación como centro de decisión e como suxeito fundamental
do seu devir, social, cultural e político.
En
1918 celebran a "I Asamblea Nazonalista Galega que reivindicou a
autonomía integral, a oficialización da lingua e o pedimento de inclusión de
Galicia na Sociedade de Nacións de Xenebra e a igualdade entre homes e mulleres.
Uxío-Breogán Diéguez Cequiel,
historiador e profesor da Universidade da Coruña.
É
Licenciado en Historia pola Universidade de Santiago de Compostela e doutor en
Historia Contemporánea pola Universidade de Barcelona coa tese “Nacionalismo
Galego. Desarticulación, resistencia e rearticulación (1936-1975).” Exerce
como profesor na Universidade da Coruña, traballo que compaxina coa súa
participación na Fundación Moncho Reboiras para o Estudo e a Divulgación da
Cuestión Social e Sindical en Galiza.
Os
seus temas centrais de estudo e investigación son a historia do nacionalismo
galego, os movementos sociais no tempo contemporáneo e a didáctica das Ciencias
Sociais. Foi un dos cofundadores de “Murguía. Revista Galega de Historia” e na
actualidade, desde o 2014, é o presidente da Fundación Alexandre Bóveda, da que
é membro da Xunta Reitora e Padroado desde 2003.
É
tamén impulsor do Manifesto Galeusca: 1933-2008 de historiadores, que deu lugar
ao I Encontro Galeusca Historia (Barcelona, 2010), ao II Encontro Galeusca
Historia (Bilbao, 2012) e ao III Encontro Galeusca Historia (A Coruña, 2015).
Ten
colaborado tamén en diversas publicacións, como A Trabe de Ouro, Grial ou Terra
e Tempo.
Algunhas
das súas obras son:
- Álvaro de las Casas. Biografía, documentos e epistolario, 2003, Galaxia.
- Síntese histórica do soberanismo galego (1846-1936), 2008, Fundación para o Estudo e Divulgación da Cuestión Social e Sindical en Galiza.
- Síntese da historia social e política da Galiza desde 1800: de Carral á Irmandade Galega, 2011, Fundación para o Estudo e Divulgación da Cuestión Social e Sindical en Galiza.
- Nacionalismo galego aquén e alén mar. Desarticulación, resistencia e rearticulación (1936-1975),2015, Laiovento.
- A Asemblea de Concellos de Galiza Pro-Estatuto, 2002, Fundación Alexandre Bóveda.
No hay comentarios:
Publicar un comentario