Acto: Premios Lingua 2016
Día: 8 de xullo
Hora: 20h
Lugar: Museo Manuel Torres
Hora: 20h
Lugar: Museo Manuel Torres
Organiza: Asociación Queremos Galego Marín
A Asociación Queremos Galego Marín realizará o acto de entrega
dos Premios Lingua 2016 este venres, 8 de xullo, a partir das 20h no Museo
Manuel Torres de Marín.
Con este premio a asociación quere recoñecer publicamente o
labor daquelas persoas e entidades que contribúen á normalización do noso
idioma, cultura e medio e dar un pequeno tirón de orellas a aquelas persoas ou
colectivos que a ignoran ou desprezan.
Este ano foron moitos nomes de persoas e colectivos que sairon á
palestra para recibir o premio, mais finalmente as e os membros da asociación
decidíronse polos seguintes:
Premio
Lingua de Ouro, na categoría individual, Lara Dopazo Ruibal. Esta
marinense nada no ano 1985 é un dos novos valores da literatura galega, sendo a gañadora de varios premios,
entre eles o certame GZ Crea 2008 pola poesía “Dende Illa Peixe”, o Francisco
Añón de poesía co poemario “Ovella” e a primeira edición do Premio Literario
Nortear co relato “Clementina”.
Premio
Lingua de Ouro, na categoría de colectivos, a Asociación Pola Defensa
da Ría (APDR). A asociación quere recoñecer con este premio a traxectoria
insubornábel desta entidade na defensa da ría e máis concretamente pola súa
loita contra a presenza do complexo industrial de Ence-Elnosa nesta. Para alén
do seu traballo polo medio, a asociación tamén quere parabenizar a esta
entidade polo seu emprego do galego como lingua de traballo e comunicación,
creando e mantendo ademais un espazo social que favorece o seu uso.
Premio
Lingua de Trapo. Este ano o Lingua de Trapo está destinado aos dous curas de Marín, José Antonio pedrosa (San Xulián) e
Fernando Chacón (Santa María do Porto), que
se negaron a realizar unha misa en galego na honra do pai paul Francisco Carballo, firme defensor do galego falecido hai xa dous anos. Con este premio, un pequeno tirón de
orellas, Queremos Galego Marín quere reclamar unha maior implicación
por parte da igrexa coa nosa lingua.
Durante o trascurso do acto, que terá
lugar o venres 8 de xullo ás 20h no Museo manuel Torres, tamén se entregarán os
premios aos vídeos gañadores da segunda edición do Concurso de Vídeos con Móbil
pola Lingua. Con este concurso a Asociación Queremos Galego Marín pretendia
ligar, especialmente entre a xente máis nova, o uso das novas tecnoloxías co
uso do galego. Baixo títulos tan suxerentes como “somos fala”, “tódalas bocan
contan” ou “touporroutou” presentáronse un vídeos cheos de imaxinación,
calidade e compromiso co galego que se poden ver na seguinte ligazón http://queremosgalegomarin.wix.com/aqgm#!blank-2/x178l.
A velada será presentada polas artistas
e actrices viguesas da Asociación Trabalingua e contará con distintas
convidadas e convidados para entregar tanto os Premios Lingua como os do
concurso de vídeos. Tamén haberá teatro da man da aula de textos teatrais da
Asociación Queremos Galego Marín que dirixe o actor, director e dramaturgo Zé
Paredes, e música da man da violinista marinense Tatiana Cidrás.
Cómpre salientar que para a VII edición
dos Premios Lingua a Asociación Queremos Galego Marín contou coa colaboración
do artista uruguaio, afincado en Marín, Marcelo Skapinachis para crear as figuras
que se entregarán á premiada e premiados cos Premios Lingua.
Ao rematar o acto a festa trasladarase á
terraza dun bar próximo onde as persoas que o desexaren poderán tomar uns
pequenos petiscos de balde.
No hay comentarios:
Publicar un comentario