20 mar. 2017

Presentación “Bolxeviques/Bolcheviques”

Presentación “Bolxeviques/Bolcheviques”
Día: 6 de abril
Hora: 20h
Lugar: Biblioteca de Marín
Organiza: Colectivo Nacionalista de Marín
O Colectivo Nacionalista de Marín presentará en Marín o libro Bolxeviques 1917-2017, editado en dous volumes por dúas editoriais distintas, Xerais e Através.
Este libro pretende ser a contribución galega para a necesaria revisión do acontecemento histórico máis importante do século XX, a Revolución Rusa; sendo unha maneira de participar desde Galiza da reflexión sobre o impacto histórico e ideolóxico deste acontecemento.
En 2017 a Revolución Bolxevique fai cen anos. Boa parte dos acontecementos deste século pode interpretarse en relación ao impacto internacional deses ideais revolucionarios e á forma como se puxeron en práctica: aliñamento de países e guerra fría, competitividade entre o bloque socialista e o bloque capitalista, enfrontados no campo ideolóxico mais tamén no tecnolóxico e no militar.
Paralelamente, producíase un conflito subterráneo que rompía as fronteiras xeográficas: filosofías disidentes introducían esa cerna ideolóxica en novas esferas do pensamento; contraofensivas, como as políticas do benestar, controlaban o avance do socialismo en países capitalistas; concepcións artísticas, símbolos e vangardas sociais deseñaban un novo mundo. Todo se viu alterado.
Cen anos despois, aproveitamos para reivindicar o legado transformador do bolxevismo e expor á luz algúns episodios escuros, mais apartando a propaganda que desde o primeiro día se fixo para distorsionar e ocultar a realidade da revolución.
Este libro dobre foi coordenado por Teresa Moure, marcando unha vía de confluencia e de inspiración para a convivencia das tradicións políticas e ortográficas de quen defende neste país a vitalidade da nosa lingua e do ensaio escrito nesta.
No volume publicado por Xerais inclúense os traballos de Justo Beramendi, Xosé Manuel Carril, Oriana Méndez, Víctor Santidrián, Xoán Carlos Garrido, Julio Prada, Uxío-Breogán Diéguez, Francisco Rodríguez, Anxo Angueira, Antón Dobao, Natalia Poncela, Xosé Manuel Outeiriño e Rebeca Baceiredo.
No volume publicado por Através inclúense os traballos de Maurício Castro, Margarida Corral Sánchez, Aurora Marco, Dionísio Pereira, Eliseo Fernández, Mario Regueira, Joel R. Gômez, José Emílio Vicente, Xosé Mexuto, Carlos F. Velasco Souto.
Para falar deste libro estará presente a coordinadora, Teresa Moure, e un dos participantes, José Emílio Vicente.
José Emílio Vicente, é xornalista e profesor. Participa no libro analizando as conexións entre o galeguismo histórico e o leninismo. Procurando unha interpretación do relacionamento entre dúas tradicións e a forma en que os intelectuais galeguistas adaptan o concepto de nación, diferente do estipulado nos escritos de Lenine.
Teresa Moure, coordinadora da obra, é escritora e profesora titular de lingüística na USC. Como escritora cultivou e cultiva todos os xéneros: poesía, narrativa, teatro, ensaio, etc. Ten gañado diversos premios literarios como o Lueiro Rey 2004, Premio Ramón Piñeiro de Ensaio dúas veces, en 2004 con Outro idioma é posible (Galaxia, 2005) e no 2011 con Queer-emos un mundo novo (Galaxia, 2012). No ano 2013 comeza a escribir a súa obra na norma ortográfica aceptada internacionalmente para os países lusófonos, o Acordo Ortográfico. As súas últimas publicacións nesa norma son en poesía Eu violei o lobo feroz(Através, 2013), o ensaio Politicamente incorreta (Através, 2014) e os romances Uma mãe tão punk (Chiado, 2014) e Ostrácia(Através, 2015).
https://ssl.gstatic.com/ui/v1/icons/mail/images/cleardot.gif


No hay comentarios:

Publicar un comentario